Bangkay sang 3 NPA leaders napapanaug na halin sa kabukiran sang Lambunao
ILOILO — Nakuha na sa bukid sang Brgy. Cabatangan, Lambunao ang bangkay sang tatlo ka lider sang New People’s Army.
Suno kay Lieutenant Colonel Jovert Pimentel, commander sang 82nd Infantry Battalion sang Philippine Army, gintuwangan sang mga tropa tatlo ka bangkay agud mapapanaug tubtob nga nakalab-ot sa Sitio Igmalapag, Cabatangan, Lambunao kag didto na gin-airlift.
Nagpadulong sa Lambunao kag nag-identify sang mga bangkay ang pamilya nanday Maria Concepcion “Concha” Araneta-Bocala kag Vivian Torato, samtang na-identify naman sang iya pamilya si Vicente Hinojales paagi sa mga litrato nga na-post sa social media.
Madumduman nga gin-report sang 3rd Infantry Division sang Philippine Army nga napatay pagkatapos sang engkwentro sa Brgy. Cabatangan sang Agosto 15 sang hapon kanday Bocala, ang 1st Deputy Secretary sang KR-P kag consultant sang National Democratic Front nga tumandok sang Manduriao, Iloilo City, kag Torato, secretary sang Central Front, KR-Panay, residente sang Sta. Barbara, Iloilo.
Antes sini, natukiban ang bangkay ni Hinojales, tumandok sang Matalam, North Cotabato kag nagaserbe nga Regional Secretary sang Komiteng Rehiyon-Panay sang Agosto 15 sang udto sa Brgy. Cabatangan man.
