3-year old pilason sang naigo sang bala sa Buenavista, Guimaras

Estable na ang kondisyon sang tatlo ka tuig nga bata nga gindala sa ospital sang naigu sang bala sang pusil nga ginpalupok sang wala pa ma-identify nga gun man sa Supang, Buenavista, Guimaras, pasado las-4 kahapon sang hapon, Agosto 23.

Nakibyasan sang bala sang pusil ang bata sa iya nga buli.

Ini ang ginkumpirmar ni Supang Punong Barangay Hernan Velasco.

Ginkumpirmar man ni PMSg. Chormel Padilla sang Buenavista Police Station nga nagapadayon pa ang hot pursuit operations sang kapulisan sa suspect nga sakay sa Tamaraw FX nga salakyan.

Base sa inisyal nga impormasyon, may naglabay nga salakyan sa lugar kag gulpihada nga may nagpalupok sang pusil.

Naigu ang bata nga yara sa higad sang laundry shop nga ginakungkong sang iya iloy.

Nagapadayon pa ang imbestigasyon sang police sa natabo. —via Marvin Malificiar