La Paz, Mandurriao kag Molo naga-usmod sang ginabanta 9mm kada tuig base sa pagtuon sang UP

Naga-usmod ang pila ka mga distrito sa Iloilo City sang ginabanta sa nine millimeters kada tuig, base sa pagtuon nga ginhimo sang NOAH Center sang University of the Philippines kaupod ang ila international partners nga naggamit sang Interferometric Synthetic Aperture Radar (InSAR) nga isa ka advanced satellite technology.

Katuyuan sang pagtuon nga ma-monitor ang paghulag sang duta sa pila ka mga major cities sa Pilipinas halin sang 2014 tubtob 2020, lakip na ang Iloilo City.

Nagapakita sa pagtuon nga pinaka-apektado sa Iloilo City ang Mandurriao, Molo, kag La Paz nga may subsidence rate ukon pag-usmod sang ginabanta eight millimeters kada tuig.

Ginalantaw diri nga rason ang madasig nga pag-boom sang mga commercial kag residential developments sa nasambit nga mga distrito kag ang dako nga populasyon sa lugar.

Magluwas sa tatalo ka distrito sang siyudad, makit-an man ang amat-amat nga pag-usmod sang duta sa mga coastal areas sang Villa, Arevalo kag naga-extend tubtob sa Oton.

Lakip man sa naga-contribute sa pag-usmod sang nasambit nga mga areas, base sa pagtuon, ang sobra-sobra nga pagkuha sang groundwater nga dala sang urbanisasyon kag pagdamo sang mga naga-ilistar nga mga tawo.

Mga patimaan diri ang pagbaha sa pila ka mga areas sang siyudad nga nagalab-ot sa buku-buko kun magtaub bisan nga nagatagiti ang init.

Na-obserbaran man ang pag-impon sang parat nga tuig sa mga bubon nga mahimo magresulta sa groundwater contamination kag maka-apekto sa water supply sang siyudad.

Magluwas sa Iloilo City, kabahin man sang pagtuon ang Greater Manila Area, Metro Cebu, Metro Davao, kag Legaspi City. — via International Journal of Applied Earth Observation and Geoinformation