Traditional jeep nga daw kaangay sa modernized jeep makit-an nga nagabiyahe sa siyudad sang Iloilo

Good vibes ang dala sang traditional jeepney nga may biyahe Villa Arevalo—City Proper sang ginhimo nga kaangay sa modernized jeep ang hitsura sini.

Suno kay Nelson Panes nga driver sang amo nga jeep, mga apat ka tuig na niya ini nga ginabiyahe, antes pa man ang pandemya.

Wala na ginbuyagyag pa ni Panes kun pila ang nagasto sa pag-modernize sang jeep nga suno sa iya, ang nagpakay-o amo ang tag-iya.

Mas ginpataas ang atup sang jeep agud pwede nga makatindog ang mga pasahero. May TV man sa sulod nga suno kay Panes, under maintenance subong.

Madamo sang nahuyugan nga magsakay sa jeep tungod magluwas sa wala naandan sini nga hitsura, may ginapatukar man nga music sa sulod sang jeep.

Dugang pa ni Panes, tungod mas madamo ang makasakay, dugang man ini sa iya income. — via Aksyon Marvin Malificiar