Cellphone, cash nakuha sang babaye nga nagsulod sa Jaro; Suspek na-capture sa CCTV
ILOILO— Nadula ang cellphone kag wallet nga may unod nga cash sang ginsulod sang wala pa makilal-an nga babaye ang balay sa Sambag, Jaro las-3 kahapon sang kaagahon, Agosto 29.
Suno kay Kagawad Roy Fama, nabugtawan ang tagbalay kag nanotisyaran nila nga wala na ang iya android cellphone nga na-charge kag ang wallet nga may unod nga cash nga P15,000.
Sang gin-review ang CCTV camera, nakita ang babaye nga nagsulod sa sliding window sang balay. Ginlab-ut pa sang babaye ang lock sang pwertahan sa kilid sang bintana pero wala niya nabuksan tungod guba, suno kay kagawad Fama.
Maniwang ang babaye, wala sang tabon sa nawong, kag nakasuksok sang “sexy” dress.
Posible pangayaw ang suspek, suno sa kagawad.
Magluwas sa insidente kaina sang kaagahon, may impormasyon man si Fama nga may nagreklamo man sa amo nga babaye nga nagpangawat sa lain nga lugar.
Gin-report sang tag-iya ang insidente sa police. — via Aksyon Farrah Mae Morano
