Ginhalinan sang bala sang pusil nga nag-igo sa lalaki nga nagapanamang sa San Miguel natumod na sang kapulisan

ILOILO – Natumod na sang San Miguel police kun diin naghalin ang bala sang pusil nga nag-igu sa 22-anyos nga lalaki nga nagpanamang sa Brgy. San Jose, San Miguel sang Biyernes sang gab-i, Agosto 30.

Ini suno kay PMAJ Richard Lao, hepe sang San Miguel Police Station, sang nag-conduct sang trajectory investigation nga ginpangunahan sang Regional Crime Laboratory sang Police Regional Office 6 sa ginluntaran sang insidente. Paagi sa trajectory investigation, mahibaluan kun diin naghalin ang bala sang pusil kag kun tubtob diin ini nagtupa.

Gindala ang biktima sa lugar agud mahibaluan ang iya position, kag kun ano ang plastada sang naigu siya sang bala. Napilasan sa alatrasan kag wala nga paa ang biktima.

“Nakakita siya (biktima) sang igrab sang pusil halin didto sa residence or ancestral house ni Delfin Guelos. So, amo na siya ang ginalantaw naton nga anggulo,” suno kay PMAJ Lao.

Pagkatapos sang insidente, ginpadulongan sang San Miguel police ang balay pero caretaker lang ang ila naabtan. Sang ginbalikan sang police tungod sa nagapadayon nga imbestigasyon, wala na sang tawo kag nakandaduhan na ang balay.

Tumandok sang Dingle, Iloilo ang biktima pero nagatrabaho bilang construction worker sa San Miguel.