6-month old baby boy nakit-an sa CR sang mall sa Mandurriao

ILOILO CITY— Ginahibalo pa subong sang police ang nagbilin sang ginabanta 6-month old baby boy sa CR sang mall sa Bolilao, Mandurriao kahapon, Setyembre 4.

Suno kay Police Captain Val Allan Cambel, OIC sang Police Station 10, nakita lang sang janitor nga nagpanglimpyo sa CR ang lapsag nga lalaki nga nagkamang mga las-2:20 sa hapon.

May bayo ang lapsag kag may nakita nga bibiron nga wala na sang sulod sa iya nga kilid, suno sa police.

Gilayon nga nag-coordinate ang tagdumalahan sang mall sa DSWD kag gin-report man sa police ang insidente.

Sa subong, nag-request na ang police sa management sang mall nga i-review ang CCTV malapit sa CR agud makabulig sa ila imbestigasyon kag matumod ang nagbilin sang bata.

Gina-atipan subong sang WCPD kag DSWD ang bata. — via Aksyon Farrah Mae Morano