1 patay sang nagbungguanay ang 2 ka motorbanca sa kalalawran sang Ajuy
ILOILO — Patay na sang nakit-an ang lalaki nga na-missing sang nagbungguanay ang duha ka motorbanca sa Brgy. Nasidman, Ajuy pasado las-3 sang kaagahon sang Setyembre 8.
Suno kay Police Staff Seargent Noel Demalinao, imbestigador sang Ajuy Municipal Police Station, wala na naga-respond ang lalaki nga na-missing nga sakay sang gamay nga motorbanca sang gintinguhaan pa i-revive sang taga-Philippine Coast Guard.
Sang gindala sa Sara District Hospital, gindeklarar sang doctor nga patay ang lalaki.
Dugang pa ni Demalinao nagalugdang na ang lalaki sang nakita sang rescuers nga ginabanta 11 oras na ang gintenir sa tubig.
Una na nga ginkumpirmar ni Brgy. Kagawad John Espiga sang Nasidman, Ajuy nga si Remie Besonia, 21-anyos residente sang amo nga barangay kag BS Marine Engineering student sa University of Iloilo ang nakita paagi sa search and rescue operation sang Ajuy Municipal Disaster Risk Reduction Management Office, Philippine Coast Guard kag Maritime Unit.
Si Espiga man ang nagapanag-iya sang daku nga motorbanca.
Sa imbestigasyon sang police, nagsugat-anay ang duha ka sakayan sa diin pakadto sa Manapla, Negros Occidental ang daku samtang pabalik naman sa isla ang pumpboat kag posible wala natalupangdan ang isa kag isa amo nga nagbungguanay.
Tungod sa impact, posible nahulog si Besonia, suno sa police. May nakita nga pilas sa dulunggan ni Besonia nga ginapatihan na-igo sa tarik.
Apat ang sakay sang daku nga motorbanca samtang duha naman sa gamay nga sakayan.
Ginpabutyag man ni Espiga nga may blinker ang iya sakayan nga nagaserbe nga sulo, pero posible wala natalupangdan tungod madulom ang lugar.
Napilasan ang isa pa ka sakay sang gamay nga sakayan, nga amo ang magulang sang na-missing, kag estable na ang kondisyon sa ospital.
Mga 50 metros ang kalayuon sa mainland sang gintabuan sang aksidente kag kun diin nakita si Bedonia suno sa police. — via Aksyon Paula Elambayo/Maria Kayla Tingzon
