Former Iloilo City Mayor Joe Espinosa ginakonsiderar nga ilakip sa linyada ni Mayor Jerry Treñas sa 2025 elections

ILOILO CITY — Gina-finalize na sang kampo ni Mayor Jerry Treñas ang mabulos sa slot ni former Public Order and Safety Management Office (POSMO) Head Jeck Conlu nga nagsumiter sang resignation sang damlag lang.

Una na ginpa-athag ni Conlu nga nag-withdraw siya sa linyada ni Mayor Treñas agud makalikaw sa conflict tungod malapit siya kay former City Mayor Jed Patrick Mabilog.

Ginkumpirmar nanday Councilor Miguel Treñas kag Vice Mayor Jeffrey Ganzon nga tatlo ka mga pangalan ang gina-istoryahan agud ilakip sa linyada sang alkalde agud magpadalagan sa pagka-konsehal para sa 2025 midterm elections.

Ang tatlo amo sanday Jose Maria “Nene” Dela Llana, Bryant Zulueta kag former City Jose Espinosa III.

Madumduman nakuhaan sang litrato kanday Executive Assistant Raisa Treñas-Chu kag Councilor Treñas kaupod kay Espinosa sa isa ka kapehan sa siyudad kag sang damlag lang nagguwa man ang litrato nanday EA Treñas-Chu, Espinosa kag Mayor Treñas.

Ginpahayag naman ni EA Treñas-Chu nga “okay gid” ang relasyon sang iya amay kag tiyo.

2019 elections sang nagkontrahanay sa pagka-alkalde sanday Mayor Treñas kag Espinosa kag liwat nagkontrahanay ang ila partido sang 2022. —via Justice Savvanah Pamplona