Pastor patay sang ginbuno sa Maasin; biktima nasal-an sang suspek nga iya naka-away

ILOILO — Nasal-an lang ang 46-anyos nga pastor kag maestro nga ginsulod sa iya balay kag ginbuno sang makapila ka beses sa Brgy. Mandog, Maasin pasado las-7:00 sang gab-i, Septiyembre 12.

Ginkilala ang biktima kay Pastor Ian Clementir nga maestro man sa Dagami National High School.

Suspek sa krimen si Jed Domingo, 35-anyos nga taga-Cabatuan.

Suno kay Police Major Jose Nemias Pamplona, hepe sang Maasin Municipal Police Station, gulpi lang nagsulod sa balay ang suspek kag ginbuno ang biktima. Wala sang pagbinaisay sa tunga sang biktima kag suspek, suno sa police.

Sa dugang nga imbestigasyon sang Maasin police, may nakabais ang suspek sa Brgy. Mandog. Hubog ang suspek sang nagsulod sa balay sang biktima kag posible nasal-an niya nga kontra ang pastor kag ginbuno, suno sa police.

Gintinguhaan pa sang biktima nga maagaw ang kutsilyo nga ginabanta nagalaba sang 39 centimeters sa suspek.

May nakita nga defense wounds ang police sa biktima, indikasyon nga nagbato pa siya kag para maprotektahan ang iya menor-de-edad nga bata nga upod niya sa balay.

Ginhingagaw pa dala sa ospital sa Cabatuan ang biktima pero gindeklarar nga dead-on-arrival. May pito ka pilas ang biktima.

Nadakpan naman sang mga barangay officials ang suspek.

Napasaka na ang kaso nga murder sa suspek. —via Paula Elambayo