Tigulang nga nagabisikleta patay sang nabungguan sang wing van sa La Paz

ILOILO CITY — Nagbaruro sa idalom sang wing van ang tigulang nga lalaki nga nabungguan sa boundary sang Ticud kag San Isidro, La Paz subong nga hapon.

Suno kay Alex, driver sang truck, nakita niya na ang tigulang tungod naga-counterflow kag sa kilid sang iya nga lane nagalabay. Pero wala siya nakapreparar sang gulpi nga nagtabok sa pihak nga lane ang tigulang.

Nagpreno pa si Alex pero tungod mabug-at ang iya karga, wala gilayon nagpondo ang wing van kag nalab-ut gid ang tigulang.

Maayo lang suno kay Alex nga wala nalapakan sang goma ang tigulang.

Gindala sa ospital ang 78-anyos nga biktima nga si Federico sang Bito-on, Jaro pero gindeklarar nga napatay la-1:32 sang hapon.

Suno kay Police Staff Sergeant Jeremy Minerva, traffic investigator sang Iloilo City Police Office, nakaagum sang pilas sa ulo ang biktima. —via Justice Savvanah Pamplona