54-anyos nga babaye pilason sang nahulog sa banglid sa Janiuay

ILOILO— Nahulog sa banglid ang 54-anyos nga babaye nga nakatapak sa mahumok nga parte sang duta sa Brgy. Canawili, Janiuay mga las-3:45 sang hapon kahapon, Setyembre 17.

Suno kay Mr. Jose Lam De Paula, acting head sang Municipal Disaster Risk Reduction and Management Office (MDRRMO) Janiuay, nagapaningit sang kapayas ang babaye sang nakatapak sa mahumok nga parte sang duta kag nahulog sa banglid nga ginabanta 100 meters ang kalayuon.

Posible naghumok ang duta tungod sang sige-sige nga pag-ulan sa lugar.

Na-rescue ang babaye kag ginpasaka sa ibabaw nga parte sang lugar, ginhatagan sang first aid antes gindala sa ospital.

Istable na ang kondisyon sang babaye, suno kay De Paula.

Padayon nga gina-monitor sang MDRRMO ang lugar agud wala na sang may masablag, suno kay De Paula. — via Aksyon Farrah Mae Morano