Balayran sa kuryente sang konsumedor sang ILECO 1 sa Pavia naglab-ot sa P2.8 million; ILECO 1 nag-ako nga “erroneous” ang reading sang kuntador
Indi makapati ang pamilya Labajo sa Brgy. Balabag, Pavia sang nakit-an ang ila bill sa kuryente nga naglab-ot sa malapit P3-million.
Nabutang sa bill nga P2,843,921.05 ang ila balayran sa kuryente nga ila nakonsumo sang Agosto.
Suno sa konsumedor nga si Jona, gilayon siya nagkadto sa opisina sang ILECO 1 sa Pavia sang nabaton niya ang bill sang Lunes para mangayo sang paathag. Naghambal suno sa iya ang staff sang ILECO 1 nga nagsala lang ang nag-reading sa ila kuntador tungod buron.
Dugang ni Jona, namangkot pa ang isa ka staff kun okay lang nga P4,000 na lang ang iya bayaran. Wala nagpasugot si Jona tubtob ginhambalan siya nga liwat ipa-reading ang ila kuntador.
Natingala si Jona kun ngaa naglab-ot sa masobra P2-million ang ila bill tungod siyam ka bombilya kag tatlo ka electric fan lang ang ila ginagamit. Wala man sila sang ref kag iban pa nga mga appliances sa balay.
Sang nagligad nga bulan, P865 lang ang ila bill para sa Hulyo nila nga konsumo.
Ginkadtuan sang Aksyon Radyo ang opisina sang ILECO 1 sa Pavia, apang gintugyan nila sa main office ang pagsabat sa reklamo.
“ERRONEOUS”
Sa pagpangusisa naman ni Engr. Mike Paguntalan, general manager sang ILECO 1, gin-ako suno sa iya sang meter reader nga indi niya mabasahan ang kuntador sang pamilya Labajo.
Gin-ako ni Engr. Paguntalan nga wala na-“red flag” sang billing personnel ang nagguwa nga resulta pagkatapos gin-encode sa computer ang reading sang kuntador nga ginpadala sang meter reader.
Bisan ang ILECO satellite office sa Pavia ang wala man na-double check ang billing sang nakita ang balayran sang pamilya Labajo.
Tungod sini, nagpangayo sang pasensya si Engr. Paguntalan tungod sa kakulangan sang mga personnel.
Kahapon, gin-ilisan na sang taga-ILECO 1 ang kuntador sang pamilya Labajo. — via Aksyon Marvin Malificiar
