“I was not and never will be a drug protector” — Ex-Mayor Jed Mabilog sa iya statement sa House Quad Committee hearing
Nangin emotional si former Iloilo City Mayor Jed Patrick Mabilog sang ginsaysay sa House Quad Committee Hearing ang mga inagyan niya kag sang iya pamilya sugod sang gintawag ni former President Rodrigo Duterte nga drug protector.
Ginpanindugan sang anay alkalde nga indi siya drug protector kag indi siya mangin drug protector.
Ginplastar man niya ang mga ginhimo niya sang siya pa ang alkalde sang siyudad agud matapna ang illegal drugs.
Ginpabutyag ni Mabilog nga wala sang basehan ang mga akusasyon batok sa iya tungod wala man ini napamatud-an. Sa pagkamatuod suno sa iya, tubtob subong wala gihapon sang may gin-file nga kaso batok sa iya may kaangtanan sa illegal drugs.
Tungod sa seryoso nga pamahog sa iya kabuhi, napilitan siya kag iya pamilya nga indi na magbalik sa Pilipinas sang nahatagan sang kahigayunan nga magtambong sang speaking engagement sa Japan.
May tiun nga nagplano siya nga magpauli sa Pilipinas apang nakabaton siya sang abiso nga may mapatay sa iya gani wala niya gindayon.
Nagapasalamat naman siya sa Kamara nga nahatagan siya sang kahigayunan kag iban pa nga indibidwal nga nadalahig sa illegal drugs nga matinluan ang ila ngalan.
