“Welcome gid si [former] Mayor Jed diri sa City Hall — Mayor Jerry Treñas sa pagbisita sang anay alkalde
Gin-abe abi ni Iloilo City Mayor Jerry Treñas si former Mayor Jed Patrick Mabilog sa pagbisita sang anay alkalde sa city hall sang Biyernes, Setyembre 20 sang nagpauli sa siyudad kadungan sang iya birthday.
Ginsulit sang alkalde nga wala niya ginakonsiderar nga kontra si Mabilog tungod parte gihapon sang iya grupo ang anay alkalde.
Trese (13) ka tuig na nga wala sila sang away ni Mabilog sugod sang nag-updanay sila sa pagpadalagan.
Ini ang rason suno sa iya kun ngaa sang nangin alkalde si Treñas, gintatap niya ang mga tinawo ni Mabilog pati na ang iya hinablos nga si Executive Assistant Sheen Mabilog.
Ginpabutyag ni Mayor Treñas nga ginbuligan niya sadtu si Mabilog sang gindalahig ang anay alkalde sa illegal drugs kag nakabaton sang mga pamahog sa kabuhi.
Gin-athag naman ni Mabilog nga isa sa mga katuyuan sang iya pagbisita sa Iloilo City amo nga makigkita kay Mayor Treñas nga nangin abyan niya sang malawig nga panahon.
Naglikaw naman ang duha sang ginpamangkot may kaangtanan sa ila plano sa pulitika. Naglikaw man si Mabilog sang ginpamangkot kun sin-o kanday Mayor Treñas kag Congresswoman Julienne Baronda ang iya suportahan sa palaabuton nga eleksyon.
Ginpabutyag ni Mayor Treñas nga indi pa tyempo ang pulitika tungod ang importante nga nakaabot sa siyudad ang anay alkalde kag madamo ang nalipay sa iya nga pagbisita.
