Anay PCSO GM Royina Garma, Col. Edilberto Leonardo gintudlo mastermind sa pagpatay kay former ICPO Director & former PCSO Board Member Wesley Barayuga sang 2020
Gintudlo ni PLTCOL Santi Mendoza kanday former PCSO General Manager Royina Garma kag Colonel Edilberto Leonardo nga yara sa likod sang pagpatay kay Atty. Wesley Barayuga, anay director sang Iloilo City Police Office kag former board member sang PCSO sang July 30, 2020.
Si Mendoza ang isa sa mga ginpatawag sa Quad committee hearing sa Kamara subong nga adlaw, sa pagpadayon sang imbestigasyon sa mga pagpamatay sa idalom sang war on drugs sang Duterte administration.
Sa iya statement nga ginbasa sa committee hearing, ginsaysay ni Mendoza nga October 2019 pa sang gintawgan siya ni Colonel Leonardo kag ginpangayo ang iya bulig para sa “special project” nga target ang high value individual sa illegal drugs. Sang amo nga tiun, major pa lang ang ranggo ni Mendoza kag na-assign sa opisina sang PNP Administration Deputy Chief.
Pebrero 2020 sang ginsugid ni Leonardo ang ngalan sang target nga amo si Barayuga. Suno kay Mendoza, halin ang mandu kay Garma nga amo sadto ang general manager sang PCSO kag may intelligence report siya sa gin-alegar kahilabtanan ni Barayuga sa illegal drugs.
Pero sang nag-lockdown tungod sa COVID-19 pandemic, temporaryo suno kay Mendoza nga nauntat ang ila pagpreparar para sa amo nga “special project.”
June 2020 sang nagsugod liwat ang ila paghulag, tubtob nga nadayon kag napatay sang gin-hire nila nga gunman kay Barayuga sang July 30, 2020.
Ginbuyagyag ni Mendoza nga nakabaton siya sang P40,000 nga reward sang napatay si Barayuga.
Si Barayuga ang nangin director sang ICPO sang 2006 tubtob 2008 kag naka-uyat man sang posisyon bilang OIC, directorial staff kag Deputy Director for Operations sa Police Regional Office 6 kag Executive Officer for the Directorate for Logistics sa Camp Crame.
