Ex-Sen. Franklin Drilon nag-apelar sa kampo nanday Baronda kag Treñas nga mag-aregluhanay

ILOILO — Nag-apelar si anay Ilonggo Senator Franklin Drilon sa kampo nanday Iloilo City Mayor Jerry Treñas kag Congresswoman Julienne Baronda nga mag-aregluhanay para sa kaayuhan sang Iloilo City.

Suno kay Drilon, kinahanglan nga indi mag-ilinaway ang mga lideres sang syudad agud malikawan ang magarot nga 2025 midterm elections.

“I appeal with our leaders to come up with a proposal or system that will avoid political conflicts at this time,” dugang pa ni Drilon.

Ginpahayag pa sang anay senador nga kun pangayuon ang iya bulig nga magpatunga sa duha ka partido, indi siya magduha-duha nga mag-istorya sa magtimbang nga bahin.

Wala naman sang ideya si Drilon sa lakat sang pulitika sa siyudad kag ginatugyan na niya ini kanday Treñas kag Baronda.

Kun mag-abot naman sa punto nga magpili si Drilon ginpasalig niya ang katapo sang media nga madesisyon siya kun sin-o ang iya nga suportahan kag luyag man niya nga mag-endorso sang iya national kag local nga kandidato.

Ginbuyagyag naman ni Drilon nga wala na siya sang plano nga magbalik sa pulitika. — via Aksyon Cedrick Anona