“I’m hoping that this will be resolved” — Rep. Janette Garin kun sin-o mapadalagan nga Vice Governor sa Iloilo province
ILOILO — Nag-apelar sang paghugpong si first district of Iloilo Congresswoman Janette Garin sa mga nagaplano nga magpadalagan bilang vice governor sa probinsiya sang Iloilo sa 2025 midterm elections.
Lakip sa mga nagguwa nga ngalan nga mapadalagan sa nasambit nga position kanday Miagao Mayor Richard Garin, Congressman Michael Gorriceta sang second district, Congressman Ferjenel Biron sang fourth district, Congressman Raul Tupas sang fifth district, Rep. James “Jojo” Ang sang USWAG Ilonggo Partylist kag 4th district Board Member Domingo Oso.
“Amo man lang ang na-appeal ko sa tanan-tanan nga indi kami dapat mag-irinaway, we all have to stay united, talk things out. Very unfortunate lang nga last minute lang ini na-istoryahan,” suno kay Garin.
Mas maayo suno sa kongresista kun indi magbahin-bahin ang nasambit nga kampo tungod madamo sang problema nga ginapangatubang ang probinsiya nga dapat solusyonan ilabe na ang halit nga ginbilin sang COVID-19 pandemic.
“I’m still praying and I’m still hoping that this will be resolved [tungod] may panahon pa man. Nagapati gid ako nga with the leadership of Governor [Arthur] Defensor, Jr., kag ang openmindedness man kang tanan-tanan, nagapati ako nga may solusyon pa ang aton nga line-up sa probinsiya,” suno kay Garin.
Sa separado nga interview kay Garin, ginpahayag niya nga may indi pag-intiendihanay sa tunga nanday Biron kag Tupas. Pananglitan indi ma-areglo, intrahan sang pamilya Garin ang vice governor nga posisyon.
Sa subong, wala pa gin-anunsyar ni Governor Defensor kun sin-o ang iya mangin running-mate sa 2025 midterm elections. Base sa reliable source sang Aksyon Radyo Iloilo, wala sa mga Garin, Biron, Tupas kag Gorriceta ang mangin running mate sang gobernador.
