Anilao Mayor Lee Ann Debuque mangin running mate ni Iloilo Gov. Arthur Defensor, Jr. sa 2025 midterm elections

Gin-anunsyar ni Iloilo Governor Arthur Defensor, Jr. nga si outgoing Anilao Mayor Nathalie “Lee” Ann Debuque ang iya mangin running mate sa 2025 midterm elections.

Ginhimo sang gobernador ang announcement sa flag raising ceremony sa provincial capitol kahapon, Setyembre 30.

Ginpahayag sang gobernador nga personal niya nga desisyon ang pagpili kay Debuque base man sa advise sa iya sang Partido Federal ng Pilipinas.

Ginhambalan siya sang partido nga magpili sang mga available options ukon kandidato sa probinsya.

Suno kay Gov. Defensor, kilala na niya si Mayor Debuque tungod pila man ka administrasyon sila nga nag-updanay kag nakahibalo siya kun paano magtrabaho ang alkalde.

“Gusto naton si Mayor Lee Ann because we want a young, intelligent, dynamic and competitive partner, [and] as a candidate of the administration for the vice governor.”

“I WILL NOT LET GOV. ARTHUR DEFENSOR, JR. DOWN. I WILL NOT LET MY PROVINCE DOWN”

Ginpasalig ni Mayor Debuque nga indi niya pagpaslawon si Governor Defensor, Jr. kag mga pumuluyo sa probinsya sang Iloilo sa pagpili sa iya bilang running mate sang gobernador sa masunod nga tuig nga eleksyon.

Sa speech ni Mayor Debuque makaligad gin-anunsyar ang iya pangalan ni Gov. Defensor, Jr. nagapati ang alkalde nga sa kumpiyansa sa iya sang gobernador, mapakita niya ang iya sinseridad kag kapisan nga mapuslan sa probinsya sang Iloilo.

Ginpabutyag niya nga bisan lamharon siya sa patag sang pulitika, sampat na ang iya kapasidad sa panghimanwa.

“Ang amon pag-updanay ni Gov. Toto ang magahatag sa isa ka tandem that will couple his wisdom and experience with my energy and dynamism for more progressive Iloilo.”

Ginpasalamatan man ni Debuque ang gobernador sa pagpili kag pagsalig sa iya nga mangin running mate sa palaabuton nga eleksyon.