Pagbaisay nanday San Joaquin Mayor Ninfa Garin kag VM Marvigrace Getuya-Lago nakuhaan sang video
ILOILO — Nakuhaan sang video ang pagbaisay nanday San Joaquin Mayor Ninfa Serag-Garin kag Vice Mayor Marvigrace Getuya-Lago kahapon, Oktubre 3.
Natabo ini makaligad nga nag-file sang ila ka certificate of candidacy ang grupo nanday Garin kag Lago.
Madumduman nga nagluntad nga conflict sa tunga sang duha ka pamilya may kaangtanan sa duta nga ginahamtangan sang ospital nga ginadumalahan sang Department of Health.
Ginpahayag nga luyag i-revoke sang pamilya Getuya ang donasyon sa duta sa diin gintukod ang extension hospital sang Western Visayas Medical Center (WVMC).
Sang Hunyo, ginbarikadahan ni Vilma Getuya, iloy ni Vice Mayor Getuya-Lago ang entrance sang ospital sa tuyo nga i-takeover ang propedad.
Nagluntad naman ang pagba-isay sa tunga ni Vilma Getuya kag ni former DOH secretary kag incumbent first district Rep. Janette Loreto-Garin nga umagad ni Mayor Garin.
Ginapanindugan sang mga Garin nga indi ma-takeover sang mga Getuya ang propedad sang gobyerno nga wala sang court order.
Sa 2025 elections, indi na magpadalagan si Mayor Garin kag sa baylo ang iya hinablos nga si Provincial Board Member Valentine Serag ang mapadalagan sa pagka-mayor sa banwa.
