Trisikad driver patay sang gintiro sa Pavia

ILOILO– Napatay samtang ginabulong sa ospital ang 42-anyos nga trisikad driver nga gintiro sang riding-in-tandem suspects sa Brgy. Balabag, Pavia kahapon, Oktubre 5.

Ginkumpirmar ni alyas Marmar nga live-in partner sang biktima nga nakaagum sang patal nga pilas sa duhan kag kilid si alyas Dodoy nga nangin rason ang iya kamatayon.

Nagabiyahe sang trisikad si Dodoy kag nagabaligya man sang prutas sa iya man nga trisikad kun makatyempo upod kay Marmar.

Ginpabutyag ni Marmar nga nagplastar sila sang ila baligya nga lansones sa kilid sang dalan sa diin nagtabok pa si Dodoy para magbakal sang softdrinks.

Sang nagbalik si Dodoy sa ila nga ginapwestuhan, may nagdulog nga motorsiklo nga ginasakyan sang duha ka mga suspect kag gintiro ang biktima.

Naka-helmet kag bayo nga itom ang duha ka mga suspetsado nga nakasakay sa motorsiklo, suno kay Marmar.

Wala sang may matudlo si Marmar nga suspek nga nagtiro sa biktima.

Indi pa maklaro sang police ang motibo sa krimen. — via Aksyon Farrah Mae Morano