P1.2 million nga balor sang suspected shabu na-recover sa duha ka drug bust operations sa Balasan

ILOILO- Naglab-ut sa P1.2 million nga balor sang suspected shabu ang na-recover sa duha ka operasyon sa isa ka adlaw sa Balasan.

Una nga nadakpan sang police operatives ang high value drug personality nga si alyas Madam upod ang 15-anyos niya nga bata nga lalaki sa Brgy. Balanti-an, Balasan kahapon sang udto.

Suno kay Police Captain Renzo Martinez, hepe sang Balasan Municipal Police Station, ginahimo nga runner sang illegal nga transaksyon ni Madam ang iya bata.

Nagabalor sang masobra P700,000 ang 11 ka sachets sang suspected shabu nga nakuha sa subject.

Samtang, sa follow-up operation sang Balasan police, nadakpan ang mag-abyan nga alyas Jr kag alyas JJ sa Brgy. Camambugan, Balasan kag na-recover ang P494,360 nga balor sang suspected shabu.

Sa impormasyon sang police, live-in partner ni alyas Madam si JJ pero wala nagatenir sa isa ka balay agud indi ma-trace ang ila illegal nga aktibidad.

Ginpanginbulahan ni IPPO Provincial Director PCol. Bayani Razalan ang madinalag-on nga operasyon sang Balasan police kag Philippine Drug Enforcement Agency 6. — via Aksyon Paula Elambayo