P3 million nga balor sang suspected shabu, na-recover sa HVI sa Bakhaw, Mandurriao
ILOILO CITY — Naglab-ot sa P3,060,000 nga balor sang suspected shabu ang nakumpiskar sa High Value Individual (HVI) sa Bakhaw, Mandurriao kahapon, Oktubre 9.
Suno kay Police Captain Val Cambel, hepe sang Iloilo Police Station 10, ginabanta 450 grams ang nakuha sa subject nga ginkilala kay Ronaldo Pedrosa, residente sang Bolilao, Mandurriao.
Dugang pa ni Cambel may nakuha man nga pusil sa subject.
Gin-ako sang subject nga nagabaligya kag nagagamit siya sang illegal drugs suno sa pulis.
Ginsugid man niya nga sa probinsya sang Iloilo siya nagakuha sang supply apang nagbalibad nga ibuyagyag kun diin sa probinsya kag kun sin-o ang iya source. — via Aksyon Maria Kayla Tingzon