P30 increase sa daily minimum wage sa private workers sa Western Visayas ginaduso

Lauman sang mga empleyado sa pribado nga kompaniya ang dugang sa minimum wage increase antes magtakop ang tuig.

Ini ang ginpahibalo ni Department of Labor and Employment director kag Regional Tripartite Wages and Productivity Board ukon RTWPB chairman, Atty. Sixto Rodriguez, sa ginhiwat nga public hearing kahapon, Oktubre 10.

Suno sa iya, tapuson ang tanan nga public hearing sa pila ka mga probinsya sa rehiyon antes desisyunan kun pila ang ipatuman nga minimum wage increase.

Ginpahayag ni Atty. Rodriguez nga indi magnubo sa 30 pesos kada adlaw ang gina-propose nga wage increase para sa mga private sector workers.        

Kun maaprubahan, mahimo nga 510 pesos halin sa 480 pesos ang minimum nga sweldo kada adlaw sang mga private workers sa Western Visayas. — via Aksyon Cedrick Anona