Anay Kapitan sang San Rafael, Tigbauan patay sang gintiro

ILOILO — Patay ang anay kapitan sa Brgy. San Rafael, Tigbauan sang gintiro kaina sang aga.

Suno kay Police Captain Alfred Mansoy, Chief of Police sang Tigbauan Police Station, gindala pa sa Guimbal District Hospital si Jovanni Triste, 58-anyos, apang napatay tungod sang pilas sa ulo kag likod sang lawas.

Sa imbestigasyon sang Tigbauan police, nagadulhog si Triste pakadto sa suba, sang ginsundan sang suspetsado kag gintiro. 

Na-identify sang pulis ang suspek sa krimen.

Ginbuyagyag ni Captain Mansoy nga may kaso nga illegal possession of firearms ang suspect kag nakapiyansa rason nga nakaguwa sa presuhan.

Daan nga hiligut-anon ang ginalantaw nga motibo sa pagpatay kay Triste// Nagapadayon ang hot pursuit operation sang Tigbauan Police sa suspetsado. — via Aksyon Cedrick Anona