Kristal nga bintana sang modernized jeep nabuka sang ginhaboy sang buka nga semento sa Arevalo

Nabuka ang crystal nga bintana sang modernized jeep sang ginhaboy sang buka nga semento sa Barangay Sooc, Arevalo mga las-7:30 kagab-i.

Suno sa pasahero nga si Nene, yara na sila sa taytay sa Sooc Proper sang ginhaboy sang buka nga semento ang crystal sa ibabaw sang bintana malapit sa puwertahan sang jeep nga may ruta ISAT-U via Mohon Terminal.

Dugang ni Nene may nagapungko nga babaye nga may ginasabak nga bata sa tabok sang bintana nga ginhabuyan sang pasahero pero wala sila na-igo.

Ginsaysay ni Nene nga posible nasagang sang kurtina ang semento gani wala na ini naglab-ot sa ginapungkuan sang babaye kag bata.

Wala na nila nakita kun sin-o ang naghaboy tungod nag-diretso na ang jeep.

Suno kay Police Corporal Clinton Cayoncat, imbestigador sang Arevalo Police Station, nagpadulong sa police station ang driver sang jeep agud magpa-blotter.

Gindala man niya ang tinipak nga semento nga ginabanta 7 inches ang kalabaon kag 2.5 inches ang kadamulon.

Ginahibalo pa kun sin-o ang naghaboy sang buka nga semento sa jeep. — via Aksyon Maria Kayla Tingzon