Proseso sa pag-codify sang traffic ordinances sa Iloilo ginabanta magalawig sang tubtob isa ka tuig
Ginapanan-aw nga magalawig sang tubtob isa ka tuig ang proseso sa pag-codify sang mga traffic ordinances sa siyudad sang Iloilo lakip ang pag-amendar sini.
Ini ang pagbanta ni Councilor Sedfrey Cabaluna, chairman sang Committee on Transportation sa Konseho, kun basehan ang pag-review sang 100 ka mga traffic ordinances.
Anum ka bulan nga minimum tubtob isa ka tuig nga maximum suno sa iya ang kinahanglan agud lubos nga mahitso ang traffic rules sa siyudad.
Ginbase man ini ni Cabaluna sang gindihon ang Local Public Transport Route Plan (LPTRP) kun diin kinahanglan ang mas ma-id-id nga proseso agud maplastar sang maayo.
Unahon sang konseho ang pagtukod sang Technical Working Group nga amo ang magapamuno sa pagbag-o sa mga ordinansa.
Nagpabutyag man si Cabaluna nga tutukan niya ang pag-codify sang traffic rules tubtob matapos ang una niya nga termino bilang konsehal. — via Aksyon Marvin Malificiar
