18-anyos nga lalaki nga ginpatay sang riding-in-tandem sa Taal, Molo wala sang malain nga record suno sa iya pamilya
ILOILO CITY — Nagasinggitan sang hustisya ang pamilya sang 18-anyos nga lalaki nga ginpatay sang riding-in-tandem sa Brgy. Taal, Molo pasado las-2:30 kahapon sang hapon, Nobyembre 19.
Suno kay Mrs. Maria Teresa Gapol, iloy sang biktima, wala sang malain nga record sa ila lugar pero may nakontra pila ka tuig na ang nakaligad si John Chris Mark Gapol nga residente sang Calumpang, Molo.
Ginsaysay sang iloy nga nagpangayo sang kuwarta ang biktima agud ibakal sang soft drinks kag inasal kaina sang hapon. Nakapauli pa siya sa ila balay agud magkaon.
Ginpahayag pa sang iloy nga may nagkadto nga abyan sang iya bata sa ila balay. Naglisensiya suno sa iya, ang biktima nga mabakal sang RTW sa Calumpang.
Nakibot na lang ang iloy sang gintawgan siya kag ginpahibalo nga gintiro ang iya bata.
Pasado las-2:30 kaina sang hapon, nagasakay sa tricycle ang biktima kaupod ang iya abyan nga si alyas Makoy, 16-anyos sang gintiro sang angkas sa motorsiklo nga nagasunod sa ila sa MH Del Pilar Street, Molo. Wala nakaagi kadto sa ila balay si Bayot pero kilala siya sang mga abyan sang biktima.
Sa impormasyon halin sa pamilya, wala na naga-eskwela ang biktima pero naga-sideline bilang freelance model. May yara sang live-in partner si Gapol.
Palaligban sa pamilya ang rason sa pagpatay sa biktima pero nagapati ang iloy nga gin-set up ang iya bata.
“WALA SANG NASUGID NGA KONTRA”
Sa interview sang Aksyon Radyo Iloilo kay Alyas Inday, live-in partner ni Gapol, wala sang nasugid ang biktima nga naka-away niya. Manug-isa ka tuig na ang relasyon sang duha.
Ginlaragway ni Inday nga hipuson ang iya partner gani palaligban sa ila ang motibo sa pagpatay sa biktima.
