18-anyos nga lalaki patay sang gintiro sang riding-in-tandem sa Molo; Suspek nadakpan
ILOILO CITY — Patay ang lalaki nga gintiro sa Taal, Molo subong nga hapon.
Base sa impormasyon nga nakuha sang Aksyon Radyo Iloilo news team, may igo sa ulo ang biktma nga pasahero sang tricycle.
Ginkilala sang pamilya ang biktima kay John Chris Mark Gapol, 18-anyos sang San Juan, Molo
Na-identify na sang Molo police ang mga suspects sa pagpatay kay Gapol.
Pero suno kay Police Captain Ryan Christ Inot, hepe sang Molo Police Station, indi pa nila mabuyagyag ang identity tungod nagapadayon pa ang ila imbestigasyon.
“Sa investigation namon, although may identified naman kita nga mga suspects pero nagapanigurado lang kami [gani] indi anay namon pag-reveal kay ginapadalman pa namon ang imbestigasyon para tsakto ang makuha nga mga ebidensiya,” suno kay Inot.
May CCTV camera footages nga natipon ang kapulisan nga nagabulig sa ila imbestigasyon sa pagpatay kay Gapol sang San Juan, Molo.
Nagasakay sa tricycle ang biktima sang gintiro sang riding-in-tandem suspects kaina sang hapon.
NADAKPAN ANG SUSPEK
Nadakpan ang suspect sa pagpatay kay Gapol, pila ka oras matapos ang krimen.
Ini ang ginkumpirmar ni Police Colonel Kim Legada, director sang Iloilo City Police Office.
Gindala sa Molo Police Station ang suspek.
Gina-imbestigaran man sang Molo police ang motibo sa krimen.
