Bangkay sang lalaki nasapwan nga nagalutaw sa suba sa San Juan, Molo
LOILO CITY — Ginkumpirmar sang pamilya nga si Alex Almores sang Boulevard, Molo ang nasapwan nga nagalutaw sa suba nga sakop sang Zone 3, San Juan, Molo subong nga hapon.
Ini suno sa iya manghod nga si Melodia sa interview sang Aksyon Radyo Iloilo news team. Naga-edad sang 62 si Almores.
Suno kay Melodia, naglumpat sa taytay tungod nagapaligo sa suba si Almores kaupod ang iya mga abyan sang Domingo, Nobyembre 17 sang gab-i. Antes sini, nag-inum-inom si Almores kaupod ang iya mga abyan.
Sang naglumpat sa taytay, wala na nakabutwa si Almores. Wala man suno kay Melodia nag-report ang mga abyan ni Almores nga wala na siya nakit-an pagkatapos nga naglumpat sa taytay.
Subong nga hapon, nakit-an sang mga nagapamunit sa suba sa San Juan ang bangkay kag may nakita nga ID gani gilayon siya nga nakilala.
Gindala na sa punerarya ang bangkay ni Almores. Sa initial nga impormasyon halin sa utod, wala na sila sang plano nga ipaidalum sa autopsy examination ang bangkay.
