Pasgpangaroling sang mga menor-de-edad dumilian kun wala sang upod nga guardian — Iloilo CSWDO
Indi pwede nga makapangaroling sa paskuwa ang mga menor-de-edad kun wala sang upod nga guardian.
Base ini sa ginpaguwa nga holiday decree sang City Social Welfare and Development Office {CSWDO} agud indi mabutang sa peligro ang mga menor.
Sa press conference sang nagligad nga semana, ginpaathag ni CSWDO Officer Merlyn Gison nga delikado sa mga kabataan nga magguwa sa ila balay nga naga-isahanon ilabe na kun kagab-ihon agud magpangaroling.
Bisan tradisyon na suno sa iya ang pagpangaroling, indi ini mapasugtan kun wala sang upod ang mga kabataan tungod may risgu nga malagas ukon makagat sila sang ido, subong man ma-aksidente sa dalan.
Ang nasambit nga polisa kabahin sang pagpaninguha sang CSWDO nga mabantayan sang safety sang mga menor-de-edad sa holiday season kag sa ginapaabot nga Dinagyang Festival.
Ginapahangop ni Gison sa pumuluyo nga mas importante gihapon ang seguridad sang mga kabataan sang sa ila matipon nga kwarta sa pagpangaroling. — via Iloilo CSWDO
