SUV nagbaliskad sang nabungguan sang depasahero nga jeep sa Guimbal

ILOILO — Nagbaliskad ang SUV sang nabungguan sang depasahero nga jeep sa Santa Rosa, Guimbal pasado las-7 kahapon sang aga. Nobyembre 25.

Suno kay Police Lt. Lario Esposo, OIC sang Guimbal Municipal Police Station, halin sa Miagao kag padulong sa Iloilo City ang direksyon sang SUV nga ginamaneho sang 53-anyos nga lalaki nga taga-Hamtic, Antique.

Halin naman sa Iloilo City kag padulong sa Miago ang direksyon sang jeep nga ginamaneho sang 33-anyos nga driver.

Sa imbestigasyon sang police, naglapaw sa kurbada nga lane ang jeep sang nag-overtake sa ginasundan nga motorsiklo gani nabungguan ang SUV.

Base sa kuha sang CCTV sa lugar, tatlo ka beses nga nagbaliskad ang SUV antes nagtakilid.

Nakaagum sang minor nga pilas ang 40-anyos nga driver sang motorsiklo sang nabungguan sang SUV.

Wala napilasan ang driver sang SUV kag ang driver sang jeep subong man ang sakay nga mga pasahero. — via Aksyon Paula Elambayo