Lalaki patay sang gintiro sa La Paz

ILOILO CITY — Ginkumpirmar sang asawa nga gindeklarar nga dead-on-arrival sa West Visayas State University Medical Center (WVSUMC) ang iya bana nga gintiro sa Brgy. Lopez Jaena Norte, La Paz kagab-i, Nobyembre 29.

Suno kay Nemia, may pilas sa tangkugo ang iya nga bana nga si Antonio Baybayanon, Jr., 27 anyos.

Halin suno sa asawa sa ila balay ang biktima kag nagkadto sa tiyangge agud magbakal kun tani sang sigarilyo.

Ginbantanyan sang suspek ang biktima kag gintiro. Nagtuyo pa nga magpalagyo ang biktima pero nalab-ut gid sang suspek.

Gilayon nga nagpalagyo ang suspek pagkatapos sang krimen kag posible may ginsakyan nga motorsiklo sa unhan.

Wala nakahibalo si Nemia sa motibo sa pagtiro sa iya nga bana tungod wala man sang may namuno nga nagpamahog sa iya. Wala man sang kontra ang biktima, dugang ni Nemia.

Gin-ako ni Nemia nga nagagamit kun kaisa sang illegal nga druga ang iya nga bana.

Ginkumpirmar ni Punong Barangay Relendez Soberano nga yara sa Barangay Anti-Drug Abuse Council (BADAC) list si Baybayanon.

Pero ginpahayag ni Soberano nga indi tokhang surrenderer si Baybayanon.

Mabuot ang pagkilala sang kapitan sa biktima nga wala sang gamo sa barangay.

Dugang ni Soberano nga antes gintiro ang biktima, wala siya sang nasugid nga pamahog sa kabuhi.– via ARI Trainee Ivan Villa