Bagon nga may karga nga construction materials nahulog sa kanal sa San Joaquin
ILOILO — Maswerte nga wala sang may napilasan sang nahulog ang bagon sa kanal sa Barangay Pitogo, San Joaquin kahapon sang aga.
Suno kay Patrolman Carlos Garcia, imbestigador sang San Joaquin Municipal Police Station, nagapatukad ang bagon sang naalangan tungod wala na nagkagat ang preno gani ginwarik na lang sang driver pa-tuo ang salakyan para indi mag-us-os sa sapa.
Tungod sini nahulog sa kanal ang bagon kag nagkalahulog man ang karga nga balas, semento, kag hollow blocks.
Dugang ni Garcia, kun wala ginwarik sang driver pa-tuo ang salakyan, daku pa ang natuga nga damage sa salakyan kag sa mga sakay.
Ginpabutyag niya nga nakaagi naman kadto sa lugar ang bagon tungod naga-deliver sang construction materials.
Nagtawag na sang crane ang tag-iya sang bagon agud makuha sa kanal. — Aksyon Maria Kayla Tingzon
