Dismissed police dakop sa buy bust operation sa Balasan
ILOILO — Dakop sa drug buy bust operation sa Brgy. Tingui-an, Balasan, Iloilo kagab-i ang dismissed police nga ginkilala kay alyas Ampol, 31-anyos.
Nakuhaan si Ampo sang P448,800 nga balor sang suspected shabu, .38 caliber revolver kag lima ka mga live ammunitions.
Suno kay Police Captain Renzo Martinez hepe sang Balasan Municipal Police Station, masobra isa ka bulan ang ila pag-monitor sa subject antes nadakpan.
Na-dismiss sa serbisyo si Ampol may kaangtanan sa kaso nga illegal discharge of firearms sang yara pa lang siya sa field training program.
Base sa pagpangusisa sang kapulisan, 2018 kag 2019 ginkasuhan si Ampol may kaangtanan sa illegal discharge of firearms.
Dugang pa ni Martinez, masami nagamaoy kag nagapinalupok sang pusil si Ampol kun nakagamit sang illegal drugs.
Preso sa Balasan Municipal Police Station ang subject kag natalana pasakaan sang kaso nga paglapas sa RA 9165 ukon ang Comprehensive Dangerous Drugs Act of 2002 kag RA 10591 ukon Comprehensive Firearms and Ammunition Regulation Act. — Aksyon Trainee reporter Ivan John Villa
