Mga tumalan-aw sa opening of lights sang Christmas Village sa Iloilo Provincial Capitol halos tunga sa oras nga nagdinaguso tungod sa kawad-an sang sistema; Pila ka tumalan-aw nagkalalipong kag naglain ang pamatyag
ILOILO CITY — Halos tunga sa oras nga nagdinaguso sang mga tawo sa palibot sang Iloilo Provincial Capitol samtang nagahulat sang opening sang Christmas Village kagab-i, Disyembre 13.
Sa obserbasyon sang Aksyon Radyo Iloilo news team, may pila ka mga tumalan-aw nga nagkalalipong kag naglain ang pamatyag tungod sa pagginutok.
Nagginutok ang mga tawo tungod wala sang sistema ilabe pa sa mga dalan sa atubang sang kapitolyo. Base sa impormasyon halin sa Provincial Disaster Risk Reduction and Management Office (PDRRMO), may mga gindala sa ospital tungod sa paglain sang pamatyag.
Nagdugang man sa pagginutok ang indi pagsirado sang dalan sa atubang sang kapitolyo rason nga may mga modernized kag traditional jeepneys nga naipit sa pagginutok.
Ginpasiraduhan ang gate sang kapitolyo kag wala ginapsulod ang mga wala sang papel sa programa antes ang opening of lights.
Isa ang opening of lights sa kapitolyo sa mga ginadugukan sang mga Ilonggo kada Disyembre.
WALA NASUNOD ANG TRAFFIC SCHEME
May traffic scheme nga ginpatuman ang Traffic and Transportation Management Office sa Opening of Lights sang Iloilo Provincial Capitol apang wala masunod tungod sa tuman kadamo nga nagpadulong sa kahiwatan.
Suno kay Jev Sajonia, miyembro sang operations sang TTMO, ang panapa sang dalan sa kilid sang Provincial Capitol ang dapat kuntani para sa foot traffic.
Apang tungod sa tuman kadamo nga tawo, nalaksam na nila ang panapa nga para kuntani sa mga salakyan.
Tungod sini, nagpatuman sang emergency re-routing ang TTMO.
