2 ka menor-de-edad patay sang nalumos sa Pavia

ILOILO– Patay ang duha ka menor-de-edad sang nalumos sa suba sakop sang Brgy. Purok4, Pavia pasado las-2 kahapon sang hapon, Disyembre 16.

Residente sang amo man nga lugar ang nalumos nga si alyas Francis, 15-anyos, samtang taga-Brgy. Aganan, Pavia si alyas Philip, 14-anyos.

Suno kay PCapt. Ryan Orleans, Deputy Chief of Police sang Pavia Municipal Police Station, nagpaligo ang duha sa suba sa idalom sang taytay upod ang duha pa gid nila ka mga abyan.

Sang nagtakas ang duha nila ka upod, nagkadto sa madalom nga porsyon sang suba ang duha ka biktima kag nalumos, suno sa police.

Sa pagpangusisa sang pulis, indi makahibalo maglangoy ang duha ka mga nalumos.

Padayon nga gina-imbestigaran sang kapulisan ang insidente. — Trainee Ivan John Villa