Performance sang 9 ka festivals sa Iloilo province balantayan sa Kasadyahan sa Kabanwahanan sang Dinagyang Festival 2025
ILOILO — Balantayan ang performance sang siyam ka mga festivals sa Iloilo province sa hiwaton nga grand launching sang Kasadyahan sa Kabanwahanan, isa sa mga highlights sang Dinagyang Festival.
Base sa Facebook post ni Mr. Bombette Marin, head sang Iloilo Provincial Tourism Office, hiwaton ang grand launching sa Disyembre 22 sa SM City Northpoint, la-una sa hapon.
Lakip sa mga ma-perform sa grand launching ang Tangyan Festival sang Igbaras, Cry of Jelicoun sang New Lucena, Kaing Festival sang Leon, Tultugan Festival sang Maasin, Tinuom Festival sang Cabatuan, Hirinugyaw-Suguidanonay Festival sang Calinog, Haw-as Festival sang Dumangas, Banaag Festival sang Anilao, kag Tawili Festival sang San Rafael.
Wala pa ma-anunsyar sang Iloilo Provincial Government ang mga festivals nga mapasakop sa Kasadyahan sa Kabanwahanan sa masunod nga tuig.
Sa calendar of activities sang Dinagyang Festival, hiwaton ang ginbansagan nga “festival of festivals” sa Enero 25, 2025 sa hapon. Ini na ang ikaduha nga tiun nga i-host sang Iloilo Provincial Government ang Kasadyahan sa Kabanwahan.
Handom naman sang Tultugan Festival sang Maasin nga depensahan ang kampeonato.
