Laborer patay sang gintiro kag gindusak sang barrel sang shotgun sa Barotac Viejo; Love triangle ginatudlo anggulo sa insidente
ILOILO — Wasak ang ulo kag may pilas sa dughan ang 36-anyos nga laborer sang gintiro sang shotgun sang security guard sa Sitio Ilawod Brgy. Poblacion, Barotac Viejo pasado las-11 kagab-i.
Ginkilala ang biktima kay alyas Vic samtang ang suspek ginkilala kay alyas Ron.
Suno kay Plt. Rene Aguinaga, deputy chief of police sang Barotac Viejo Municipal Police Station, nadakpan ni alyas Ron ang iya asawa nga naga-chat kay alyas Vic.
Tungod sini, ginkuha ni Ron ang cellphone sang iya asawa kag nag-chat sa biktima nga makadto sa ila balay.
Nagpadulong ang biktima sa balay sang suspek sakay sa motorsiklo. Ginsugata naman sang suspek ang biktima kag gintiro sang shotgun. Sang natumba, gindusak pa sang suspek sang barrel sang shotgun ang dughan sang biktima.
Ginpahayag sang police nga antes gintiro, malikaw pa kuntani ang biktima pero wala nakahingagaw.
Nagapadayon ang hot pursuit operation sang kapulisan sa suspek. — Aksyon Paula Elambayo
