Barangay tanod patay sang gintiro sang anay miyembro sang AFP sa Pototan
ILOILO– Na-identify na sang police ang suspek sa pagtiro patay kay alyas Rose, 34-anyos nga barangay tanod sa Brgy. Cau-ayan, Pototan sang Disyembre 23 sang gab-i.
Suno kay Police Senior Master Sergeant Noli Penarubia, imbestigador sang Pototan Municipal Police Station, ginkilala ang suspek kay alyas Roger 59-anyos nga residente sang amo man nga lugar kag anay miembro sang Armed Forces of the Philippines (AFP) pero nag-AWOL.
Sa imbestigasyon sang police, nagapapuli na ang biktima sang nalabayan niya ang suspek kag nagbaisay sila nga duha tubtob natabo ang pagpangtiro.
May isa ka igo sang pagkatiro sa dughan kag duha sa tiyan ang biktima nga gindala sa Iloilo Provincial Hospital sa Pototan pero napatay samtang ginabulong.
Na-recover sa crime scene ang lima ka basiyo sang suspected .45 caliber pistol.
Sa pagpangusisa sang police, may daan nga hiligut-anon ang duha sang Agosto subong nga tuig.
Ginsaway sang biktima ang suspek tungod padayon nga naga-videoke bisan las-12 na sa tungang gab-i. Nag-atubangay ang duha sa barangay kag nag-aregluhanay man, suno sa police.
May record man sadto ang suspek, suno sa police nga may gintiro-patay nga babaye sa Pototan.
Padayon ang hot pursuit operation sang kapulisan sa suspek. — ARI Trainee reporter Ivan John Villa
