Helper patay sang gintiro sang iya employer sa City Proper
ILOILO CITY — Patay ang helper nga si alyas Jino, 21-anyos, sang gintiro sang iya employer nga si Rayton Tinte, 50-anyos sa Valeria Extension, Brgy. Kauswagan, City Proper las-10:30 kagab-I, Disyembre 27
Suno kay PLT. Romelo Tabuyoc, OIC sang Iloilo City Police Station 1, madugay na nga stay-in helper sang suspek ang biktima nga may negosyo nga plastic wares sa City Proper.
Base sa pagpangusisa sang kapulisan, natabo ang insidente sa garahe sang suspek kun sa diin gina-akigan sang suspek ang biktima pero ginasabat siya sang biktima tubtob nagbaisay sila nga duha.
Tungod sini, naggabot sang pusil ang suspek kag gintiro sa tiyan, kilid sang dughan kag buli ang biktima suno sa pulis.
Na-recover ang tatlo ka basiyo sang bala.
Gindala sa St. Paul’s Hospital ang biktima apang gindeklarar nga dead-on-arrival.
Nagapadayon ang hot pursuit operation sang kapulisan batok sa suspetsado. — ARI Trainee Reporter Ivan John Villa
