Mga rubber flowerpots sa atubang sang SM City Mandurriao gin-arado sang awto
Gin-arado sang salakyan ang mga rubber flowerpots sa tabok sang SM City sa Diversion Road, Mandurriao las-11:45 sang Disyembre 27 sang gab-i.
Ginkilala ang driver kay alyas Danny 57-anyos sang Brgy. Calubihan, Jaro.
Suno kay Patrolman Arman Angkoy, imbestigador sang Traffic Enforcement Unit, halin sa ilimnan si danny kag pauli na kuntani sa Brgy. Calubihan sang natabu ang insidente.
Sa dugang nga pagpangusisa sang pulis, nagtalang si Danny nga ma-U-turn kuntani pabalik sa nasambit nga barangay apang sa mga flowerpots siya nagliko kag ginpilit magdiretso.
Nakalab-ut pa ang driver sa tabok sang Zuri Hotel kag didto naabtan sang police.
Gin-aku man ni danny nga nakainom siya upod ang iya mga abyan suno sa pulis.
Ginaprepar na sang kapulisan ang mga papeles pananglitan magpasaka sang kaso ang City Government batuk sa driver sang salakyan
Kaso nga reckless imprudence resulting in damage to property ang posible atubangon sang driver suno sa pulis. — Aksyon Trainee Reporter Ivan John Villa
