Pelikula ni Ilonggo Director Elvert Bañares ginkilala bilang Best Film sa 8th Brunei Film Blitz sa Brunei Darussalam
Nangin madinalag-on ang pelikula ni Ilonggo Director Elvert Bañares nga “Sa Sulod sang Lukait nga Gal-um” (Inside An Empty Raincloud) sang ginkilala ini bilang Best Film sa 8th Brunei Film Blitz Festival sa Brunei Darussalam sang Disyembre 22.
Nagasentro ang istorya sang pelikula sa isa ka writer nga may balatian kag gamay na lang ang nabilin nga tiun sa iya kabuhi. Nagaka-eksperyensiya sang “writer’s block” ang nasambit nga writer kag luyag ni Bañares nga mapakita kun ano ang matabo kun madulaan sang inugsulat ang manugsulat.
Isa sa mga nangin inspirasyon ni Direk Bañares sa paghimo sang amo nga pelikula ang mahatagan sang dungog ang mga manugsulat tungod suno sa iya, gamay lang ang naga-tackle sang mga istorya parte sa mga manugsulat kag manugbasa.
Hiligaynon kag Tagalog ang gingamit nga lenggwahe sa pelikula. Bagay nga ginahatagan gid sang importansiya ni Direk Bañares sa mga pelikula nga iya ginaobra.
“Gusto ko bala nga kada kadto sang pelikula abroad, mabatian nila indi lang Tagalog or Filipino, kundi ang Hiligaynon man kay Hiligaynon is also a national language,” suno kay Bañares.
Pamaagi man ni Direk Bañares nga mapakita sa iban nga pungsod ang iban pa nga pagginawi kag kultura sang mga Filipino paagi sa pelikula kabangdanan nga nagapasakop siya sa mga international film festivals.
Ini na ang ikaduha ka tuig nga pagpasakop ni Direk Bañares sa nasambit nga film festival. Sa una niya nga pagpasakop, nakuha niya ang Jury Award sa isa pa niya ka pelikula.
