Elf truck nga may karga nga softdrinks naglamsot ang preno kag nakabunggo sa pader sa Zarraga

ILOILO — Pilason ang driver sang truck nga si alyas Marvin, 34-anyos sang naglamsot ang preno ang iya ginamaneho nga elf truck kag nakabunggo sa pader sang eskwelahan sa Brgy. Poblacion Ilaud, Zarraga las-11:20 kahapon sang aga, Disyembre 30.

Suno kay Police Captain Dandy Ilalto, Officer in Charge sang Zarraga Municipal Police Station, halin sa Brgy. Gines, Zarraga kag ma-deliver kuntani sang iya karga nga softdrinks sa Zarraga ang driver.

Base sa pagpangusisa sang pulis, natalupangdan sang driver nga naglamsot ang preno sang salakyan rason nga ginliko niya pasulod sa exit sang establisemento kag ginbunggo sa pader sang eskwelahan.

Nagupi ang bumper sang salakyan sang isa ka pulis nga nagapaguwa halin sa establisemento sang na-sideswipe sang truck antes nabunggo sa pader.

Pilas sa wala nga tiil kag nagreklamo sang pagpalanakit sang lawas ang driver sang truck sang naipit sa driver’s seat tungod sa impact sang pagbunggo. Gindala siya sa Iloilo Provicial Hospital sa Pototan.

Wala naman nasamaran ang pulis nga driver sang salakyan. Wala na sang plano pa magpasaka sang kaso ang pulis batuk sa driver sang truck kag nagsugtanay nga bayaran ang mga damages sang salakyan nga iya na-sideswipe. — ARI Trainee reporter Ivan John Villa