Lalaki nga nagsaway sa komosyon sa guwa sang iya balay sa Alimodian nabun-an
ILOILO — Nagapaayo na sa ospital sa syudad sang Iloilo ang 34-anyos nga lalaki sang ginbuno sa Sitio Bugtong Brgy. Cuyad, Alimodian pasado las-12:45 kahapon sang kaagahon, Enero 1.
Ginkilala ni Police Lieutenant Rolly Sorongon, deputy station commander sang Alimodian Municipal Police Station, ang biktima kay Ricky Anib samtang ang suspek ginkilala kay Noel Bagogonia.
Suno kay Lieutenant Sorongon, may nagluntad nga komosyon sa guwa sang balay sang biktima kun sa diin may mga naga-disco antes natabo ang insidente.
Nagguwa ang biktima kag ginsaway ang mga nagkomosyon sang gulpi lang ginbuno sang suspek sa dughan.
Wala sang pagbinaisay nga natabo sa tunga sang suspek kag sang biktima suno sa police.
Sa pagpangusisa sang police, sang nakaligad nga semana ginpatawag sa barangay ang duha tungod sa indi pag-intindihanay pero wala na-areglo.
Detained sa custodial facility sang Alimodian police station ang suspek nga pasakaan sang kaso nga frustrated murder. — Aksyon Paula Elambayo