Security guard ginreklamo nga nagpalupok sang pusil sa Barotac Nuevo
ILOILO — Gin-aresto sang Barotac Nuevo Municipal Police Station ang 26-anyos nga security guard sang business establishment sa Ilawod, Barotac Nuevo sang ginreklamo nga makapila ka beses nga nagpalupok sang pusil pasado las-11 kagab-i, Disyembre 31.
Suno kay PCAPT Cedrick Cruz, hepe sang Barotac Nuevo MPS, ginreklamo sang mga residente ang security guard sang makapila ka beses nga gintiro ang ‘no parking’ signage sa atubang sang establisyemento.
Sang nagresponde ang kapulisan, naabtan nila nga ginataklos pa sang security guard ang 9mm pistol nga gintudlo niya nga iya service firearm.
Pero sang ginpangayuan sang dokumento ang security guard, wala siya sang mapakita.
Hubog ang security guard sang naabtan sang police.
Na-recover sa lugar ang anum ka basiyo, kag loaded nga magazine sang pusil.
Preso sa Barotac Nuevo MPS ang security guard kag ginapreparar na ang ipasaka nga mga kaso nga paglapas sa RA 10591 ukon Comprehensive Firearms and Ammunition Regulation Act, kag Illegal Discharge of Firearm. — Aksyon Marvin Malificiar
