Mangunguma gintiro sa Alimodian; Suspek nadakpan

ILOILO — Nadakpan na sang kapulisan ang suspect sa pagtiro sa 49-anyos nga mangunguma sa Barangay Atabay, Alimodian kahapon sang aga, Enero 2.

Suno kay Police Lieutenant Rolly Sorongon, deputy chief of police sang Alimodian Municipal Police Station, paagi sa hot pursuit operation kag bulig sang mga barangay officials, nadakpan si alyas Lando, 68-anyos nga residente man sang barangay.Dugang ni Sorongon nga gin-identify man sang biktima nga si alyas Ramon, 49-anyos ang suspect.

Sa pagpangusisa sang police sa biktima, padulong siya sa iya uma para magpamubod sang iya kasapatan sang nasumalang ang suspect kag gulpi siya gintiro.

Base sa bala nga nakuha kag igo sang biktima, ginpahayag ni Sorongon nga naga-anggid sa 12-gauge shotgun ang pusil nga gingamit sang suspect sa pagtiro.

Wala na na-recover ang pusil kag ginpanginwala sang suspect nga siya ang may kahimuan sang krimen.

Nagaguwa sa pag-imbestigar sang police nga may daan nga hiligut-anon ang mga bata sang suspect kag biktima tubtob nga na-involve na sila kag gin-report sa barangay.

Preso sa Alimodian Police Station ang suspect samtang nagapaayo sa ospital ang biktima nga nakaagum sang pilas sa abaga, paa, kag dughan.