Opening Salvo sang Dinagyang 2025 hiwaton sa masunod nga semana

ILOILO CITY — Hiwaton sa masunod nga semana ang opening salvo sang Kasadyahan sa Kabanwahanan kag Ati Tribes Competition nga highlights sang Dinagyang Festival 2025.

Base sa calendar of activities sang Dinagyang Festival 2025, hiwaton sa Enero 9, Huwebes, ang opening salvo sang Kasadyahan sa Kabanwahanan sa Iloilo Freedom Grandstand, las-2 sa hapon. Ini na ang ikaduha ka tuig nga gina-host sang Iloilo Provincial Government ang ginabansagan nga “festival of festivals.”

Pagkasunod nga adlaw, Enero 10, ang opening salvo naman sang Ati Tribes Competition sa Iloilo Freedom Grandstand nga masugod las-2 sa hapon.

Magapakita sang patilaw nga performance ang siyam ka mga festivals nga nagapasakop sa Kasadyahan kag ang walo ka mga tribu nga nagapasakop naman sa Ati Tribes Competition.

Sa Enero 25 kag 26 hiwaton ang nasambit nga mga events nga ginapaabot dugukan sang mga tumalan-aw.