ICPO nag-request sang signal jamming para sa Dinagyang Festival 2025
Ginkumpirmar sang Iloilo City Police Office nga may sulat sila nga naga-request sang signal jamming sa Dinagyang Festival 2025.
Suno kay Police Major Shella Mae Sangrines, spokesperson sang ICPO, sang Nobyembre 2024 nila ginpadala ang sulat sa Iloilo Festivals Foundation, Incorporated (IFFI).
May mga designated areas lang sa siyudad nga maka-eksperyensya sang signal jamming base sa request sang ICPO.
Wala pa sang approval ang request.
Madumduman sang Dinagyang 2024, wala may ginpatuman nga signal jamming sa highlights sang kahiwatan makaligad ginbalibaran ni Mayor Jerry Treñas ang request sang ICPO sa rason nga makasablag ini sa komunikasyon kag quick response sa tiun sang emerhensya.
Sang Dinagyang Festival 2023, madamo ang nagreklamo sa ginpatuman nga signal shutdown tungod indi lang ang siyudad sang Iloilo ang naapektuhan kundi pila ka mga banwa sa probinsya sang Iloilo pati na ang Guimaras.
