Central Philippine University nakabaton sang bomb threat

ILOILO CITY — Ginkumpirmar sang Jaro Police sang gin-report nga may nag-message sa Facebook page sang Central Philippine University (CPU) may kaangtanan sa bomb threat kahapon sang aga.

Apang sa pagpangusisa, wala sang nakita nga bomba sa CPU sang gin-search sang Iloilo City Police Station 3 kag Explosive Ordnance Disposal (EOD).

Ginkumpirmar ni Police Captain Mary Jane Panes, officer-in-charge sang Police Station 3, nga mga las-11:20 sang aga sang may nagpadala sang mensahe sa Facebook page sang unibersidad nga may malupok nga bomba pero wala sang ginhatag nga oras kag lokasyon.

Dugang ni Captain Panes, indi pa matumod kun dummy ukon personal account ang gingamit sa pagpadala sang mensahe.

Padayon nga gina-imbestigaran sang kapulisan ang insidente. Na-forward na sa Regional Anti-Cybercrime Unit 6 ang account agud matumod kun sin-o ang may kahimuan.

Ini na ang ikatatlo nga unibersidad sa Iloilo City nga may gin-report nga bomb threat. Sang nagligad nga tuig, may gin-report man nga bomb threat sa Iloilo Science and Technology University (ISAT-U) kag University of the Philippines Visayas.